27 января 2021

Дзолюк

Дона лыддысьысьяс!

Талунъя петас сиам детсадйын уджалысь кагульничаяслы.

Кагульничаяслӧн уджыс зэв кывкутана, сы вӧсна мый на киын миян вужвойтырлӧн аскиа луныс – коми челядь. Чужас кӧ дзолюкъяс сьӧлӧмъясын Чужан му радейтӧм, коми кыв тӧдны кӧсйӧм, морта-мортӧс пыдди пуктӧм, сiдзкӧ, позьӧ эскыны коми войтырлӧн водзӧ сӧвмӧмӧ.

«Дзолюк» уджтасӧ пыртӧма нёль юкӧд. Ясли арлыда челядькӧд уджлы сиӧма неыджыд юкӧн. Медшӧр уджыс нуӧдсьӧ 2-7 арӧса челядькӧд. Программалӧн сюрӧса юкӧдыс тэчӧма вит велӧдан юкӧнысь: «Йӧз котыркӧд йитӧдъяс сӧвмӧдӧм», «Тӧдӧмлунъяс сӧвмӧдӧм», «Сёрнитанног сӧвмӧдӧм» , «Мичлун гӧгӧрвоӧм сӧвмӧдӧм», «Дзоньвидзалун сӧвмӧдӧм», кодъяс нӧшта на торъялӧны некымын юкӧнув вылӧ. Уджтас помын эмӧсь Содтӧдъяс, кытчӧ пыртӧма гижӧдъяс, ворсӧмъяс, шылада репертуар. Сiдзжӧ вайӧдӧма методика комплект да коми-роча кывчукӧр.

Уджтас дорӧ Содтӧдӧ пыртӧма нӧшта и роч кыв велӧдан методика индӧдъяс. Татчӧ лои пыртӧма коми да роч кывъяс костын торъялӧмъяс серти вежсьӧмъяс, вайӧдӧма коми дзолюкъяслы гӧгӧрвоана примеръяс.

Небӧгсӧ дасьтысьысьяскӧд ми ӧттшӧтш чайтам, мый кагульничаяс небыд сьӧлӧмӧн, челядьӧс пӧся радейтӧмӧн, кывкутӧмӧн пӧртасны олӧмӧ став могъяссӧ, да пыр кутасны тӧд вылын, мый ичӧтдырсӧ коляланногыс дыр кежлӧ кольӧ челядь вежӧрын да петкӧдчӧ налӧн водзӧ олӧмас.

Дзолюк : коми детсадлы уджтас / уджтассö дасьтiсны: З. В. Остапова, Н. Н. Морозова, В. А. Муравьёва [да мукöд] ; З. В. Остапова öтув редакция улын. - Сыктывкар : Анбур, 2020.

Инвентарнöй номеръяс: 12749к - дх, 12750к - дх.