28 августа 2019 Менам классДона лыддысьысьяс! Со и колис челядьлӧн медбур кад – шойччан лунъяс. Регыд бара виччысьӧ найӧс школа, парта, ранеч, радейтана велӧдысь да, дерт жӧ, радейтана класс. И талунъя петас сиам велӧдчан кадлы. Вӧзъям лыддьыны роч гижысьлысь, Ф. Вигдоровалысь «Менам класс» небӧг, кӧнi висьтавсьӧ школадырся олӧм йылысь. Небӧгын авторыс - ачыс профессия сертиыс велӧдысь - висьталӧ том ныв йылысь, кодi сӧмын на заводитӧ уджавны школаын, сы йылысь, кыдзи сiйӧ корсьӧ, думайтӧ, мукӧд дырйиыс серьезнӧя ӧшибайтчӧ, дзугыльмылӧ да радлӧ, велӧдӧ челядьӧс и такӧд тшӧтш велӧдчӧ ачыс, опыт вылын тӧдмалӧ, кутшӧм ыджыд шуд лоны сӧветскӧй учительницаӧн. Оз на ставыс ладмы сы уджын, но челядьӧс радейтӧмыс, найӧс тӧдмавны зiльӧмыс отсалӧны сылы унджыкысьсӧ аддзыны колана туй. Велӧдысь, код нимсянь гижӧма тайӧ небӧгсӧ, висьтавлӧ аслас удж йылысь збыльнога да прӧстӧя, тайӧ и тшӧктӧ лыддьысьысьӧс волнуйтчыны сыкӧд тшӧтш, мӧвпавны висьталӧмтор йывсьыс. Чайтам, мый тайӧ небӧгсӧ интересӧн да аслыс пӧльза вылӧ лыддяс и том велӧдысь, и студент, и верстьӧ велӧдчысьяс. Вигдорова Ф. Менам класс : Учительницалöн гижöдъяс / Ф. Вигдорова ; вуджöдiс К. Туркин. - Сыктывкар : Коми Госиздат, 1951. - 316 л. б.
Инв. номеръяс: 110422 – дх, 110424 - дх Лыддьӧй небӧгсӧ! | |
