г. Сыктывкар

ул. Орджоникидзе, 10

ул. Катаева, 41

8 (8212) 255-422

leninka@nbrkomi.ru

Пн - Пт: с 10.00 до 19.00

Сб: выходной

Вс: с 10.00 до 17.00

Последняя среда месяца - санитарный день

санитарный день

Национальная библиотека Республики Коми
Умная библиотека для общества знаний
Меню
19 марта 2021

«Лыддьысям комиöн» / Обзор краеведческих новинок «Читаем на коми языке»

Пыдди пуктана лыддьысьысьяс!

Талунъя «Выльторъяс» лист бокын корам тöдмасьны коми сьыланкывъя сборникъясöн, Алексей Поповлöн да Иван Ногиевлöн выль коми кывъя петасъясöн.

Баева Л. В. Лöз синъяса ас чужанiн : сборник песен коми композиторов / Министерство культуры, туризма и архивного дела Республики Коми ; ГБУ РК "ЦНТ и ПК" ; авт.-сост.: Л. В. Баева, Т. Н. Бушенева. – Сыктывкар. 2020. – 167 с. : ил.
Баева Л. В. Лöз синъяса ас чужанiн : сборник песен коми композиторов / Министерство культуры, туризма и архивного дела Республики Коми ; ГБУ РК "ЦНТ и ПК" ; авт.-сост.: Л. В. Баева, Т. Н. Бушенева. – Сыктывкар. 2020. – 167 с. : ил.

Коми Республикаса Национальнöй библиотекаö воис сьыланкывъя выль сборник. Нимыс сылöн – «Лöз синъяса ас чужанiн». Петic 2020 воын Сыктывкарын. Небöгсö дасьтiс ыджыд котыр: Йöзкост творчество сöвмöдан да тöдöмлун кыпöдан шöрин, Коми Республикаса Национальнöй библиотека, Коми Республикаса Национальнöй архив, Коми Республикаса филармония, Питирим Сорокин нима Сыктывкарса канму университетлöн Коми муын йöзöс велöдан история музей да Александр Осипов нима шылада озырлун видзан-сöвмöдан шöрин.

«Лöз синъяса ас чужанiн» öтувъя небöгö чукöртöма Коми Республикаса нималана профессиональнöй шылад тэчысьяслысь уджъяссö. Тайö Александр Осипов, Яков Перепелица, Вацлав Мастеница да Прометей Чисталёв. Öтувъя небöглöн аслыспöлöслуныс сыын, мый сэтчö чукöртöма ичöт тиражöн петавлöм сьыланкывъяс, нотаяс, а нöшта пыртöма уджъяс, уна сикас фото, телеграммаяс, концертвывса программаяс да афишаяс, киöн гижöм копияяс. На пöвстын эм и öнiöдз йöзöдлытöмторъяс. Нöшта быд сьыланкыв дорö сетöма нотаяс.

Сьыланкывкöд коля : сборник песен VI Республиканского фестиваля детской песни "Сьыланкывкöд коля" / Министерство культуры, туризма и архивного дела Республики Коми ; ГБУ РК "ЦНТ и ПК". – Сыктывкар : [б. и.], 2020. – 39 с.
Сьыланкывкöд коля : сборник песен VI Республиканского фестиваля детской песни "Сьыланкывкöд коля" / Министерство культуры, туризма и архивного дела Республики Коми ; ГБУ РК "ЦНТ и ПК". – Сыктывкар : [б. и.], 2020. – 39 с.

«Сьыланкывкöд коля» сьыланкывъя небöг петic 2020 воын Сыктывкарын. Öтувъя небöгö чукöртöма «Сьыланкывкöд коля» республикаса квайтöд фестивальö пырöдчысьяслысь уджъяссö. Челядь сьыланкывъяслöн фестиваль мунiс Сыктывкарын 2018-öд воын. Татчö пырисны сэтшöм сьыланкывъяс, кодъясöс донъялic республикаса жюри да кодъяс воисны сьöлöм выланыс кывзысьяслы, а нöшта найöс сьылiсны челядьлöн коллективъяс.

Öтувъя небöг вылын уджалiсны: Коми Республикаса культура, туризм да архив удж министерство; Коми Республикаса Йöзкост творчество сöвмöдан да тöдöмлун кыпöдан шöрин.

Небöгсö дасьтöма сы могысь, медым сыöн вермисны вöдитчыны самодеятельнöй художествоа коллективъяс. Челядьлöн коллективъяслы кокньöд вылö татчö чукöртöма унапöлöс жанра сьыланкыв. Найö зэв гöгöрвоанаöсь, мича шыладаöсь, кокниа сьывсьöны да кольöны юрад. Быд сьыланкыв аслыспöлöс да лов кыпöдана. Наын кылö помтöм муслун бать-мам дорö, пöль-пöч да чой-вок дорö, Чужан му дорö.

Попов А. В. Войтъяс : висьтъяс = Капельки : рассказы / Алексей Попов ; [перевод с коми Анастасии Поповой]. – Сыктывкар : Эском, 2020. – 69, [1], 73, [1] лист бок встреч. паг. – Рассказы на коми и русском языках. – К 100-летию Республики Коми.
Попов А. В. Войтъяс : висьтъяс = Капельки : рассказы / Алексей Попов ; [перевод с коми Анастасии Поповой]. – Сыктывкар : Эском, 2020. – 69, [1], 73, [1] лист бок встреч. паг. – Рассказы на коми и русском языках. – К 100-летию Республики Коми.

Алексей Вячеславович Попов чужис 1950-öд воын Висер вожса Ыджыдвидз сиктын. Пырö Россияса гижысьяслöн котырö, Коми Республикаса нимйöза гижысь, драматург. Челядьлы «Бикинь» нима республикаса журналын шöр редактор.

Алексей Вячеславович Поповлысь повесьтъяс да висьтъяс йöзöдлiсны: «Север», «Сельская молодежь», «Наш современник», «Войвыв кодзув» журналъяс, еженедельник «Литературная Россия» да мукöд газет-журнал. Гижöдъяссö вуджöдöма мари, удмурт, татар, чуваш, коми-пермяк, хакас, финн, француз, болгара, эст, венгр кывъяс вылö. Сылöн пьесаяс кузя пуктiсны нин спектакльяс Коми Республикаса Виктор Савин нима академическöй театр да Коми Республикаса шылада-драмаа театр, а сiдзжö Россияса, Болгария да Франция театръяс.

Эмöсь Национальнöй библиотекаын и Алексей Поповлöн ки помысь гижöдъяс: «Олöм войтъяс», «Финн-угр мойдъяс, «Коркö öд аддзысям...» : кык юкöна мелодрама, «Зэв тешкодь морт» : кык юкöна пьеса.

Нöшта Алексей Попов вуджöдчö ачыс. 2018-öд воын дзöля челядьлы петавлiсны сыöн вуджöдöм финн, мари, карел, öстяк, удмурт да яран войтырлöн мойдъясыс. Комиöдiс Любовь Терентьевалысь «Эска ог эскы» : пьеса; Игорь Жеребцовлысь «Коми му йылысь быдмысь войтырлы висьтъяс» да сiдз водзö.

Алексей Поповлöн петавлicны торъя небöгъяс: «Олöм олысьяс» (1990), «Чудь мыльк» (2001), «Туналöм ордым» (2002), «Шань Олыся» (2005), «Грезд» (2008), «Мывкыд парма» (2011), «Ышмысь шыпас» (2011), «Мыж вештöм» (2011), «Ёма пöчлöн козин = Подарок Бабушки-Яги» (2013), «Ермолин» (2018). А öнi Коми Республикаса Национальнöй библиотекаö воис «Войтъяс = Капельки» выль небöг, петiс 2020-öд воын Сыктывкарын «Эскöм» небöглэдзанiнын. Татчö пыртöма 48 неыджыд висьт, кодъясöс «Войтъяс» нима выль небöгö нöшта сетöма роч кывйöн, а вуджöдöма найöс Анастасия Попова.

Ногиев И. И. Профицит да дефицит : висьт // Войвыв кодзув. 2020. 11 №. 9-27 л. б.
Ногиев И. И. Профицит да дефицит : висьт // Войвыв кодзув. 2020. 11 №. 9-27 л. б.

Кулöмдiнса олысьяслы да художествоа гижöдъяс лыддьыны радейтысьяслы бура тöдса Иван Ногиевлöн нимыс (сылöн сайним – Парма Вань). Иван Иванович чужис-быдмис Парма грездын, помалiс Кулöмдiнса шöр школа. Помалiс Егорьевскöй авиационнöй училищеö да Сыктывкарса каналан университет. Уджавлiс Печораса аэропортын, велöдiс Кулöмдiнса шöр школаын, сэсся зiлис райцентрса милицияын.

Иван Ногиев йöзöдчö «Парма гор» район газетын, «Бикинь», «Чушканзi», «Войвыв кодзув» журналъясын да öтувъя небöгъясын. Сылöн петавлiсны «Ая-пиа», «Кодлы ме öнi кола», «Сауна», «Санта-бабушка», «Важ снимок», «Мöдысь оз пур», «Здук кежлö парторг», «Мамлöн кевмöм», «Дона козин» да уна мукöд висьт, а сiдзжö повесьтъяс: «Ёма», «Век он дзебсясь», «Бергöдтöм томдыр», «Генерал гöтыр», «Кирö Васьлöн фото», «Букыш гожöм» да сiдз водзö.

Эмöсь Иван Ногиевлöн торъя небöгъяс: «Винегрет» (2011), «Евлог да сылöн ёртъяс» (2018). Бöръяыс пырö кассета сборникö, кодöс лöсьöдiс Кулöмдiнса шöр библиотека.

«Войвыв кодзув» журналлöн 2020-öд вося 11-öд номерын йöзöдöма Иван Ногиевлысь «Профицит да дефицит» висьт. Шöр геройясöн лоö семья: бать – Öлеш Миш, гöтыр – Опонь Катя да налöн ныв Валя. Бать-мам шуисны ньöбны нылыслы нимлун кежлас пальто. Öлеш Миш первойсö зэв збодера да кыпыд лолöн ветлöдлic нылыскöд магазинъястi, виччысис, кор нылыс аддзас аслыс кодь пальто. Но Валялы нинöм эз во сьöлöм вылас, то вывтi югыд рöма, то пукалö сы вылын полöкалö вылын моз, то абу сы серти, то кузь, то дженьыд. Öлеш Миш дзикöдз мудзис видзöдны нылыслöн бöрйысьöм вылö, сулалiс быттьö бокöвöй морт. Сылы дум вылас уси, кыдзи войдöр эз бöрйысьлывлыны, кутшöм тöвар ваясны, сэтшöмöс и ньöбисны. Сэки Веждiнö кыськö рочьяс вайисны тöдтöм кыв «дефицит». А öнi магазинъяс да рынокъяс тырöмаöсь быдсяма тöварнас, ньöбась, мед сöмын сьöмыд эм. Йöз костын мыччысис выль кыв – «профицит». Абу кö тэныд колана тöварыс, верман вузасьысьяс пыр корны да некымын лун мысти дзик тэныд вылö ваясны.

Гортас кушöн бергöдчöм бöрын Öлеш Миш шуис гöтырыслы, мый сэсся оз мун нылыскöд пальтотö корсьны. А гöтырыс вочавидзис, мый шойччан лунö ачыс ветлас Валякöд.

А кутшöм лоöмторъяс да майшасьöмъяс виччысьöны геройясöс водзö, тi тöдмаланныд, лыддянныд кö асьныд «Профицит да дефицит» висьтсö.

  • Духовые инструменты. История исполнительского искусства
    Духовые инструменты. История исполнительского искусства
    Толмачев Ю.
    Учебник
  •  Методика обучения игре на духовых инструментах
    Методика обучения игре на духовых инструментах
    Гержев В.
    Учебное пособие
  • Die Dame mit der bemalten Hand
    Die Dame mit der bemalten Hand
    Wunnicke Christine
    Роман
  • Streulicht
    Streulicht
    Ohde Deniz
    Роман
  • Herzfaden
    Herzfaden
    Hettsche Thomas
    Роман
  • Aus der Zuckerfabrik
    Aus der Zuckerfabrik
    Elmiger Dorothee
    Роман
  • Serpentinen
    Serpentinen
    Bjerg Bov
    Роман
  • Саксофон: джаз, блюз, поп, рок
    Саксофон: джаз, блюз, поп, рок
    Хаймович А.
    Учебное пособие
< >
Яндекс.Метрика