г. Сыктывкар

ул. Орджоникидзе, 10

ул. Катаева, 41

8 (8212) 255-422

leninka@nbrkomi.ru

Пн - Пт: с 10.00 до 19.00

Сб: выходной

Вс: с 10.00 до 17.00

Последняя среда месяца - санитарный день

санитарный день

Национальная библиотека Республики Коми
Умная библиотека для общества знаний
Меню
29 мая 2020

Ме уджала шондiöн талун… Интервью с коми поэтом Ниной Обрезковой

Март 11-ӧд лунӧ ассьыс юбилей пасйис нималана коми гижысь Нина Александровна Обрезкова. Чужан лун паныдыс ми, сылӧн ёртъяс да лыддьысьысьяс, аддзысьлім сыкӧд – армис зэв шоныд ёрта сёрни. Нина Александровна вочавидзис сэк вель уна юалӧм вылӧ, уна гусятор восьтіс аслас олӧмсьыс. И, дерт, кыдз и пыр, философствуйтӧмӧн, бурсӧ и лёксӧ пасйӧмӧн, ставсӧ джуджыда мӧвпыштӧмӧн, гумӧвтӧмӧн-шымыртӧмӧн. Да серам-шмонитӧмӧн, дерт – сэтшӧм нин сійӧ морт. Жаль, мый эг унджыкӧн сэк чукӧрмывлӧй, но унаӧн на пиысь, коді вӧлі, корисны гижны-йӧзӧдны вочакывъяссӧ. И, со, пӧжалуйста, унджык сёрнисӧ лэдзим талун ӧтуввезйӧ. Аттьӧ Нина Александровналы выль пӧв вочавидзӧмысь!

ТУЙ

- Туйö кутшöм петалöм йылысь колины медбур казьтылöмъяс?

- Туйыд ставыс ас местаас бур. Но медся кузь туй, кытчӧ ме петалі, вӧлі 1980 вося сентябрӧ. Ми локтім велӧдчыны Косланса шӧр школаӧ, и первой вежоныс ӧдва и коли - сэтшӧма гортӧ кыскис. Вежон помланьыс и мӧдӧдчим гортӧ. Ӧні, дерт, мыйкӧ вунласьӧма нин, но помнита, петім куим ныв да гоз-мӧд зон. Кослансянь СИМ туйӧдз кайим подӧн, сэсся СИМ кузя мунім кутшӧмкӧ лесовозӧн и... пӧжалуйста: комын километр няйт, кӧлеяа, мунны позьтӧм туй, но ГОРТӦ. Мӧдӧдчим. Тайӧ туяс ме унатор гӧгӧрвои первойысь: кор явӧ кылӧ музыка ли песня, сідзкӧ тэ узян. Мунан и узян. Мый кӧлеяті мунны кокниджык, петан кӧ, пыр и усян, быттьӧ гуран бокыс кутӧ усьӧмсьыс. И уна татшӧм гӧгӧрвоантор. И медбӧрын, ме ог тӧд кыдз, ми воим. И кор тыдовтчис миян вичко, а сэсся нин керкаяс, ме бӧрддзи... Тайӧ туйӧ петӧм йылысь медбур казьтылӧм, ӧд сэки ме, гашкӧ, первойысь тӧдмалі аслам вынлысь могутасӧ.

- Кутшöм мытшöдъяс сюрлiс венны туйын?

- Коркӧ Эстонияын велосипеда турпоездка вӧлі. Асывсяньыс миянлы туйӧ, а наваль зэрӧ. И тадз быд асыв. Но мый вӧчны - туй "зовёт". Вот тадз вежон чӧж. А воам стоянка вылас - шондіа, лӧнь, шуд. А збыльвылас мытшӧдъяс сӧмын ёнмӧдӧны мортсӧ. И, дерт, сетӧны позянлун бара на асьтӧ ошкыштны. Не гораа, мед некод оз кыв.

- Кымынысь тi вöлiнныд суйöрсайын? Кутшöм канмуын тi вöлiнныд медунаысь? Кутшöм му, кар медъёна кажитчис?

- Вӧлі эг уналаын. Медся частӧ вӧвлі Эстонияын. Мукӧд вонас кыкысь. Весиг мунны кӧсйи овны, да вот век на тан))) Кажитчӧ Тарту кар, а ӧні и Таллинн кутіс кажитчыны. Коркӧ Болгарияын вӧлі да ӧти лунӧ муні став странасӧ - лунвывсянь войвылӧдз. Та йылысь менам "Русскиня" висьт. Коркӧ петавліс "Войвыв кодзув"-ын.

- Мыйкöд йитчöма тiян творчествоын мунöм-ветлöм кадакывйöн тшöкыда вöдитчöмыс? Кывтöм, катöм, уялöм, лэбалöм…  Небöг нимъясын тайö тшöтш петкöдчö: «Коркö локтан гортад», «Вуджöд менö, пыжанöй», «Лэбачöн вола», «Сизим пыжа»…

- Мортыд тай киа-кока, да быть ветлӧдлы ). Олӧмыс, шуны кӧ рочӧн, в движении. Ӧд олӧмас туйыс и эм медся интереснӧйыс. Туй - туян ли он тэ овнысӧ? И тшӧктӧма олӧмыс - ТУЙ! Быть вылӧ туй!

ЧУЖАН ЛУН

- «Чужан лун кежлас бать-мамыс козьналісны Вералы фотоаппарат. Вера кватитіс еджыда-сьöда кудсö да уськöдчис аслас жырйö. Сэсся здук кежлö восьтыліс öдзöссö да горöдіс:

-Аттьö!!!

Вера дыр нин виччысис татшöм козинсö. И со, бать-мамыс быттьö  кылöмаöсь сылысь гуся мöвпъяссö». 

Кутшöм дивö-козин йылысь ті некор он вунöдöй? Казьтыштöй ассьыныд медся шуда чужан лун.

- Чужан лун йывсьыс челядьдырысь ме ёнасӧ ог и помнит. Но студенталігӧн коркӧ веськалі гортӧ чужан лун каднас. И кытыськӧ зонъяс вайисны меным розаяс. Кытысь мый? Мартын розаяс!!! Ӧні позьӧ быдлаысь быдтор ньӧбны. А сэки? Места пӧ надо знать, шуыштісны, и ставыс.

- Тöданныд-ö ті, вежон кутшöм лунö, кымын часын, кутшöм поводдя дырйи да кутшöм гаж лунö ті чужинныд?

- Точнӧ тӧда, мый ӧбед кадӧ. Гугл, дерт, ставсӧ тӧдӧ, но сійӧс ог кутӧй дӧзмӧдны - карантин дырйи сылӧн и сідз юр выв тыр удж)

- Кыдзи эськö ті пасйинныд ассьыныд чужан лунтö, вöлінныд кö ті волшебникöн либö тіян кö вöлі ыджыд машина тыр сьöм?

- Вӧлі кӧ менам ыджыд машина тыр сьӧм, ньӧби эськӧ первой тайӧ ыджыд машинасӧ, медым гортӧдз, Удораӧдз, мунны сибдывтӧг, сэсся дзоньталі туйсӧ, сэсся мамлысь керкасӧ, а сэсся разӧді висьысьяслы - мед бурдӧны. Тырмас ӧд став вылас та мында сьӧмыс???

- Мыйла Нина? И коді татшöм нимсö сетіс тіянлы? Эсканныд-ö ті, мый мортлöн олантуй да этш-сям вылö тöдчö мортлöн нимыс?

- Нина нимыс оз вӧлі кажитчы ньӧти. Миян сиктын менам быдмиг вӧлі кык Нина, ме коймӧд. (дзик тай Нёбдінса Виттор моз куті гижны). Налы Нина нимыс вӧлі быттьӧ моздӧ, а меным оз. А сэсся коркӧ верстьӧӧн нин лыдди, мый тайӧ грузинскӧй ним. Вӧлӧма царица Нино. Сэсся кутіс кажитчыныджык. Грузинка, гашкӧ, ме? А, гашкӧ, царица?

 РӦДВУЖ

- Мыйысь ті ошканныд ассьыныд челядьтö? Налöн кутшöм вермöмъясöн, этш петкöдчöмöн позьö нимкодясьны?

- Том йӧзлӧн асланыс олӧм. Но меным нимкодь, мый шань йӧз, ӧта-мӧдсӧ пыдди пуктӧны. Менӧ оз кедзовтны). А сэсся мед йӧзыс да олӧмыс донъяласны.

- Мыйысь медъёна ті аттьöаланныд ассьыныд бабтö?

- Разнӧй кад вайӧ разнӧй аттьӧалӧм. Коркӧ, мый отсаліс, гашкӧ, велӧдӧмыс кузь туйын да йӧз муын, коркӧ, гашкӧ, видан кадӧ эз вид, коркӧ шойччӧдіс уджалан кадӧ. Эм мыйысь. Но медъёна быд кадӧ аттьӧала ыджыд мамӧс сыысь, мый велӧдіс уджавны, вӧчны быдсяма кипом удж: и кепысь кыны, и корӧсь кор йӧрны, и ытшкысьны, и агсасьны, и сабри тальны да сабри-стӧг чӧвтны... Эг кӧ мун гортысь, эськӧ велалі и пач тэчны, и гӧрны, и печкыны, и... Унатор на, мыйӧ эг удит велӧдчыны...

- Мый медся донасö, бурсö сетіс тіянлы мамныд? Чайтанныд-ö, мый мыйкö энö удитöй висьтавны сылы, юавны ловъя дырйиыс сылысь, юксьыны кутшöмкö шудöн либö шогöн сыкöд?

- Ӧні гӧгӧрвоан, кыдзи мамыд пессис миян вӧсна. Верстьӧ нин вӧлі, а воас карӧ да век кӧсйӧ отсавны, кӧть мыйӧнкӧ. Тайӧс - шуӧма тадз - морт олігӧн он гӧгӧрво... А вот кор оз кут тайӧ тырмыны - гӧгӧрвоан... да он тай бергӧд. Но да мый шуны - шусьӧма, мый висьтавны - висьталӧма. Да ӧд и ӧні вомӧс абу кӧрталӧма - висьтав, норась, аттьӧав - рӧдительяс ӧд ставсӧ кылӧны и отсалӧны. Таысь и аттьӧ ӧні.

- «Все мы родом из детства» - татшöм кывъяс эмöсь öти роч сьыланкывйын. Корам казьтыштны челядьдырся вöвлöмтор.

- Челядьдырыд шуда. Ставнас, кӧть кӧркӧ и синваа. Первойысь кайи бабӧкӧд ытшкысьны. Кыдзи кужи, ытшки. Рытнас баб мамлы висьталӧ: "А вот и покосыс Нинаыдлӧн - пӧрнӧй мужик кодь". А меным долыд!!! Кужам ог ми ӧні тадзи ошкыны чедлядьӧс? Вӧвъясӧн ёна кажитчис меным гӧнитлыны. Коркӧ и шыбитіс вылыссьыс ӧти саръя-саръя вӧв, мӧд вӧв куртан машинаӧн бадь пиӧ нуис, коймӧд гортас сизим километр сайӧ кӧсйис гӧнитӧдны, да чеччыны ковмис. А коркӧ, ар квайт-сизима ыджыд ваӧн вуджны видлім юсӧ пыжӧн - ёна колӧ вӧлі дикӧй лук, петӧма пӧ мӧдлапӧлас тшем. Ётшкысим берегысь и вперед!!! А зібторнад нӧ кыдзи венласян ыджыд вакӧд? Вот и босьтіс ваыс аслас сывйӧ да кылӧдны кутіс... Горзӧмнымӧс кылӧма берегвывса дядьӧыс, аддзӧма ли... Петіс тай мотора пыжнас да кыйис миянӧс. Кытчӧ эськӧ и кылӧдіс Мозын юным?.. Ас, ас, а тулыснад и юыд ышмӧ, оз сӧмын мортыд...

- Эм-ö тіян котырын торъялана, аслыспöлöс традиция? Эм-ö рöдвужлöн реликвия?

- Менам эм порок доз, ӧшалӧ стенмын. Коді оз тӧд, шуас: «Какая интересная фляжка». А порок дозйыс, весиг ог тӧд, кодлӧн. Дедъяслӧн кольӧма, дерт. Важ нин.

СЬӦЛӦМКЫЛӦМ

- Мортлöн кутшöм этш сер медъёна дöзмöдö тіянöс? Дышлун, пöръясьлöм, асныралöм либö мыйкö мöдтор?

- Медся ог радейт дыш да пӧръяч йӧзӧс.

ГИЖАН УДЖ

- Кыдзи артмö кывбур? Медводз чужö кутшöмкö мöвп/идея либö юрö воö образ? А, гашкö, коркö весиг и рифма индö, мый йылысь колö гижны?

- Артмӧны быд ногыс. Коркӧ ставнас артмӧ друг. Коркӧ первой строкаыс воӧ, коркӧ бӧръяыс. Коркӧ аслад жӧ кывбурысь воан мӧд кывбур дорӧ. Но, дерт, медся тшӧкыда кывбурыд чужӧ, буретш чужӧ сьӧкыд кадӧ, сэк, тыдалӧ, мортыслӧн лолыс восьса енэжыслы, и локтӧ кывбура отсӧг, мед сьӧлӧмыд оз пот, ли он йӧймы. Тайӧ интервью гижигас куим кывбур нин гижи). Шуда кадас озджык чужсьы менам кывбурыд, сы вӧсна мый некор - колӧ шудсӧ апавны)

- Кодлы медводз лыддянныд выльöн чужöм кывбур? Кор, кутшöм здукö гöгöрвоанныд, мый ставсö шыльöдöма, став колана кывсö аддзöма – гижöд позьö йöзöдны?

- Водзсӧ вӧлі первой лыддя верӧслы, а ӧні нылӧйлы. Кор кывбурыс помавтӧм-вӧчтӧм, сійӧ пукалӧ кӧнкӧ пытшкад да гыжъясьӧ вӧля вылас, но лэбнысӧ оз вермы...

< >
1/4
  • Концертная фантазия на темы Ж. Бизе из «Кармен» и «Арлезианки»
    Концертная фантазия на темы Ж. Бизе из «Кармен» и «Арлезианки»
    Лукьянов Д.
    Ноты
  • Маленькие пьесы для ударных инструментов и фортепиано. Старшие классы ДМШ
    Маленькие пьесы для ударных инструментов и фортепиано. Старшие классы ДМШ
    Ред.-сост. В. А. Ловецкий
    Ноты
  • Пьесы для литавр и фортепиано
    Пьесы для литавр и фортепиано
    Васильченко Н.
    Ноты
  • Ритмические диалоги для дуэта литавр и малого барабана
    Ритмические диалоги для дуэта литавр и малого барабана
    Лукьянов Д.
    Ноты
  • Rudiments. Time. Control. Speed : техника барабанщика
    Rudiments. Time. Control. Speed : техника барабанщика
    Степанов П.
    Учебное пособие
  • Школа игры на ударной установке "Би-Боп"
    Школа игры на ударной установке "Би-Боп"
    Авалиани И.
    Учебное пособие
  • Школа игры на ударной установке. Ритмические рисунки, грувы и биты
    Школа игры на ударной установке. Ритмические рисунки, грувы и биты
    Чидди К.
    Учебное пособие
  • Духовые инструменты. История исполнительского искусства
    Духовые инструменты. История исполнительского искусства
    Толмачев Ю.
    Учебник
< >
Яндекс.Метрика