г. Сыктывкар

ул. Орджоникидзе, 10

8 (8212) 255-422

leninka@nbrkomi.ru

Пн - Пт: с 10.00 до 19.00

Вс: с 10.00 до 17.00

Суббота - выходной

санитарный день

Национальная библиотека Республики Коми
Умная библиотека для общества знаний
Меню
24 июня 2019

Лыддьысям комиöн (Читаем по-коми)

2019-öд во. 45-öд петасъяс

«Лыддьысям комиöн» 45-ӧд петас тöдмöдö Дереваннöй сиктлы сиӧм фотоальбомӧн, Елена Афанасьевалӧн «Кутш» нима выль небӧгӧн да Зарни Люсялӧн выль кывбуръясӧн.

«Медся муса чужанiнöй, кöнi коли челядьдыр...» : [фотоальбом / рук. проекта: Е. В. Булышева, А. В. Ульянов ; сост. : Т. Н. Удоратина, А. В. Игушева ; ред. А. В. Ульянов]. - Сыктывкар, 2018 (Коми республиканская типография). - 127, [1] с., [8] л. цв. фот., портр. : фот., портр. Пер. загл.: «Края нет милее, где прошло наше детство…».

«Медся муса чужанiнöй, кöнi коли челядьдыр...» фотоальбом сиöма Дереваннöй сиктлы 360-öд вося тшупöда пас кежлö. Дереваннöй сикт йылысь 2008-öд да 2013-öд воясö петавлiсны нин «Дереваннöй сиктöй – менам сьöлöмшöр» да «Ичöт сиктöй – олан гажöй» нима небöгъяс.

Тайö фотоальбомсö дасьтöм вылын уджалiсны Т. Н. Удоратина да А. В. Игушева, а юрнöдiсны проектнас Е. В. Булышева да А. В. Ульянов. Фотоальбом петiс Коми республиканскöй типографияын 2018-öд воын. Сиктса войтыр отсöгöн лои чукöртöма сюрс сайö важ да öнiя фотоснимокъяс, кодъяс пыр тырвыйö воссьö сиктыслöн аслыспöлöслуныс. Небöг дасьтысьяс пуктiсны мог – пыдiсяньджык петкöдлыны тайö сиктыслысь мичлунсö, тöрытъя да талунъя лунъяслысь историясö.

Воссьö петасыс Мария Чувьюровалöн «Дереваннöй» нима кывбурöн, а коми йöзкостса поэт Василий Лодыгин сиöма сиктыслы «Джуджыд нöрыс» нима дзонь поэма.

Эм лыддьысьысь дорö водзкыв, кöнi авторъяс сьöлöмсяньныс аттьöалöны найöс, кодъяс пуктiсны книга лэдзöмын пай. Шыöдчöмын найö пасйöны, мый тайö фотоальбомыс – öтувъя вынъясöн чужтöмтор, кутöны лача, мый сиктса олысьяслы вежöрас коляс нэмöвöйся пас. Аттьöалöны фотоальбом лэдзны отсалöмысь Ольга Савастьяноваöс, Надежда Дорофееваöс, Дмитрий Шатохинöс да мукöдöс.

Танi эмöсь сьöда-еджыда да цветнöй фотоснимокъяс. Тайö и сиктса пионеръяслöн да шöр школас велöдчысьяслöн, а со сиктса велöдчысьяс лыжи вылынöсь. 1953-öд во – Дереваннöй сиктса велöдчысьяс Кулöмдiнын слёт вылын. 1958-öд во – волейбол кузя нывъяслöн команда лоис вермысьöн районса спартакиадаын. А со нöшта фотояс: сиктса паропланист Владимир Бондаренколöн, Дереваннöйысь зонъяс служитöмаöсь Афганистанын, «За боевые заслуги» медаль Сергей Удоротинлы морöсас пысалö Россияса Президент Владимир Путин да сiдз водзö.

Кутш : висьт / Елена Афанасьева ; серпасалic А. В. Княжева. – Сыктывкар, 2019. – 16 лист бок : серпас.

Елена Афанасьева чужис ноябр 14-öд лунö Удора районса Важгорт сиктын. Помалiс Сыктывкарса каналан университет. Пырö Россияса гижысь котырö. Олö Сыктывкарын. Уджалö Республикаса гижысь котырын литературнöй консультантöн.

Заводитлiс гижны роч кыв вылын, сэсся босьтчис гижны комиöн. Елена Афанасьевалысь гижöдъяссö позьö лыддьыны «Йöлöга» газетысь, «Арт», «Би кинь», «Войвыв кодзув», «Чужан кыв», «Наш современник», «Дон», «Юность» журналъясысь, «Белый бор» альманахысь, «Удора, Удора кык мича ю дорын», «Сьöлöмшöрöй менам, Удора» да «Пöлöзнича пöвстын» нима сборникъясысь.

Эмöсь сылöн сiдзжö асшöр небöгъяс: «Лэбачöс ки помысь вердi», «Енкöлаö ыбöс», «Каленик-лэбач», «Ву», «Дуда Платтьöа», «Эжöр-вежöр», «Мöвпалан визьяс».

2019-öд воыс вайис Елена Евгеньевналы нöшта öтиöс – «Кутш» нима выль небöг. Тайö неыджыд висьт, кöнi авторыс тыр-бура висьталӧ коми грезд-сиктъяс бырӧм йылысь. Шöр герой, том морт, кодлы школасяньыс на челядьыс сетлöмаöсь Кутш ним. А артмöма тайö тадзи. Кодкö велöдчысьяс пиысь вайöма классö лэбачьяс йылысь небöг, кытысь лист бок вылын челядь аддзисны серпасалöм кутшöс. Ванька Саш горöдiс: «О, тайö жö тэнад синъясыд!», мый вылö зонка вочавидзис: «А ме кутш и эм». Тайö нимыс сэсся нэм кежлас ляскысьöма сылы. Висьт заводитчö сыöн, быттьö зон вöтасьö да мунö некутшöм могтöг важöн нин ветлывтöм ордымöд. Первой воисны муяс, сэсся козъя вöр, а сэсся тыдовтчисны керкаяс.

Дзирдалысь кодзув : кывбуръяс / Зарни Люся // Войвыв кодзув. 2019. 1 №. 4-6 лист бокъяс.

Людмила Зарниевна Втюрина (Зарни Люся) чужис тöв шöр 11-öд лунö Изьва районса Кельчиюр сиктын. Шöр школа бöрын велöдчис Перым карса каналан культура институтын. Сiйö Коми Республикаса заслуженнöй уджалысь. Пырö Россияса гижысь котырö. Некымынысь петавлiс вермысьöн «Войвыв кодзув» журналлöн «Эзысь борд» нима республикаса конкурсын.

Медводдза кывбуръяссö йöзöдліс 2001-öд воын Изьва районса «Новый Север» газетын. А сэсся вöліны кывбуръяс, кодъясöс йöзöдісны «Был у меня хороший друг», «Сыктывкар», «Собрание разлук», «У камелька» гижöд чукöръясын, эст кывъя небöгын да республикаса газет-журналъясын.

Людмила Втюриналöн петавлiсны торъя небöгъяс: «Шоныд дiяс», «Майбыр кад», «Тöвся öшкамöшка», «Олöмлы ода», «Дзоляньлöн дзольгöм».

Бöръя воясö Зарни Люся гижö сiдзжö проза. Вуджöдiс Соломония Пылаевалысь мойдъяссö роч кыв вылö.

2019-öд вося «Войвыв кодзув» журналлöн медводдза номерас йöзöдöма Людмила Зарниевна Втюриналысь «Дзирдалысь кодзув» кывбура цикл. Тайö ним улас сетöма 6 кывбур: «Асъя гöсьтъяс»; «Рытыв-вой тöв»; «Кодзув», «Мудер аньяс»; «Сыктыв ю»; «Окав менö».


Ёртъяс, лыддьысьöй миянкöд öтшöтш, радейтöй чужан кыв. Коми гижысьяслöн небöгъяс вылас быдмис и быдмас на вель уна морт. Став бурсö ставныслы!

Выль петасъясöн позьö тöдмасьны Национальнöй библиотекаын, небöгъяс сiдзжö верманныд босьтлыны гортö лыддьöм вылö.

Лыддьысям комиöн (Читаем по-коми)
2019-öд во. 45-öд петасъяс
  • Искусство медленного чтения
    Искусство медленного чтения
    Монография
  •  ДНК = DNA: история генетической революции
    ДНК = DNA: история генетической революции
    Уотсон Джеймс Дьюи
    Научно-популярная литература
  •  Рабочие отношения
    Рабочие отношения
    Рубан В. Д.
    Популярная психология
  •  В главных ролях
    В главных ролях
    Рунге Татьяна
    Популярная психология
  • Das Göttinger Nobelpreiswunder - 100 Jahre Nobelpreis
    Das Göttinger Nobelpreiswunder - 100 Jahre Nobelpreis
    Cправочное издание
  • Валентина Челинцова
    Валентина Челинцова
    Трифонова Г. С.
    Монография
  • Казимир Малевич и его пророчество о «новом бытие»
    Казимир Малевич и его пророчество о «новом бытие»
    Сидорина Е. В.
    Монография
  • Иконография Сталина
    Иконография Сталина
    Руцинская И. И.
    Монография
< >
Яндекс.Метрика