20 декабря 2018 Лыддьысям комиöн (Читаем по-коми)Лодыгин В. Сирӧд вуж : висьт / Василий Лодыгин // Войвыв кодзув. 2018. 10 №. 8-13 лист бокъяс. Пер. загл.: Смолистый корень : рассказ.
Василий Лодыгин – Коми йöзкостса кывбуртэчысь, Россияса гижысьяс да журналистъяслöн котыръясӧ пырысь, Коми комсомоллöн да Коми республикаса Правительстволöн Иван Куратов нима премияса лауреат, Коми республика да Россия Федерацияысь культураын пыдди пуктана уджалысь. Чужис Кулöмдiн районса Габов грездын. Сыктывкарса пединститут помалöм бöрын велöдiс аслас районын роч кыв да литература, сэсся уджалiс радиоын да «Парма гор» газетын.
Василий Лодыгин йöзöдчö «Би кинь», «Войвыв кодзув», «Север» журналъясын; «Коми му», «Парма гор», «Выль туйöд», «Звезда», «Молодежь Севера», «Маяк Сысолы» да мукöд газетъясын. Сылöн поэзияыс бура тöдса коми войтырлы. Кывбуръясас кылöны ывлаысь сьöлöм шонтана рöмъяс, Чужан му, мам да нывбаба дiнö помтöм муслун, на йылысь быдлунъя тöжд, йöз сёрниысь босьтöм шань коми кывъяс. Сылöн кывбуръяс вылö сьылöны ставлы тöдса сьыланкывъяс: «Сикöтш», «Чöскыд эськö коляозйыс», «Зонлöн сьыланкыв» да сiдз водзö. Гижö сiдзжö казьтылöмъяс, очеркъяс, поэмаяс. Василий Лодыгинлöн петавлiсны торъя небöгъяс: «Менам улича», «Ставыс на водзын», «Мича лун», «Мусукасян рöм», «Габовсаяс» да мукöд.
2018-öд вося 10-öд номерын «Войвыв кодзув» журналын йöзöдöма Василий Лодыгинлысь «Сирӧд вуж» нима висьт. Шöр герой Прокö Öльöксанлы вöлi зэв любö, мый сылöн быдмö пи. Нимсö сетiсны пöльыслысь – Проша. Батьыс быдлаö босьтлiс сiйöс сьöрсьыс. Сизим арöссянь чöс туй вылö тшöтш кутiсны ветлыны. Гöтырыслы тайö сьöлöм вылас эз во, эз ошкы и Прокö Öльöксанлöн батьыс внуксö зэв на дзолясянь кесйöдлöмысь. Проша дас нёль арöсын нин кужис вöчны уна пöлöс удж, весиг батьсö велöдлывлiс. А водзö «Сирӧд вуж» нима висьт висьталö охотникъяслöн олöмысь быдпöлöс лоöмтор йылысь. | |
