г. Сыктывкар

ул. Орджоникидзе, 10

8 (8212) 255-422

leninka@nbrkomi.ru

Пн - Пт: с 10.00 до 19.00

Вс: с 10.00 до 17.00

Суббота - выходной

санитарный день

Национальная библиотека Республики Коми
Умная библиотека для общества знаний
Меню
19 декабря 2018

Алёна Старцева: «Коми кывйӧн лолала да ола…»

Том гижысьяскӧд бурджыка тӧдмасьӧм могысь ӧтчыдысь тӧлысьнас библиотекаын уджалысьяс нуӧдӧны «Восьтам небӧг» клуб бердса «Том.ру» лист бок.

Ӧшым тӧлысь 17 лунӧ вӧлі Алёна Старцевакӧд аддзысьлӧм. Сёрниыс муніс коми кыв вылын, а роч кывъя войтырлы синхрон аппарат отсӧгӧн вуджӧдчисны Кыв технология сӧвмӧдан шӧринысь Лыткин Илья да Королёва Анна.

Коми кывбуралысь лыддис ассьыс гижӧдъяс, висьтыштіс кутшӧм сьӧлӧмкылӧмъясӧн йитчӧмаӧсь найӧ. Шуам, «Коми йӧз, мый нӧ ті керанныд?..» кывбурын гижысь шензьӧ коми мам-бать вылӧ, кодъяс кутшӧмкӧ помкаяс вӧсна оз сёрнитны чужан кывйӧн ныв-пикӧд, корӧ мӧвпыштны, воны ас садьӧ да видзны коми кыв.   

«…Мыйла нӧ асланыд пиянад
Кыв дінӧ муслунсӧ вианныд?
Он накӧд сёрнитӧй комиӧн,
Кытчӧдз ми тадзитӧ воамӧй?...
Воӧй бӧр ас садяд, донаяс.
Ставӧн ми Парма йӧз, комияс.
Ачымӧс кора и тіянӧс –
Быдтам вай коми ныв-пиянӧс!»

Ассьыс гижан сямсӧ Алёна пыр сӧвмӧдӧ том авторъяслӧн республикаса семинаръяс вылын, на пиысь ӧтиыс Гожся университет, кытчӧ сійӧ воліс школаын на велӧдчигас. Ӧні сійӧ пырӧ Лито-Арт том гижысьяслӧн котырӧ, коді уджалӧ Елена Афанасьевалӧн веськӧдлӧм улын. 

Том кывбуралысь шоныд кывъясӧн казьтыштіс кыдзи ассьыс коми кыв велӧдысьсӧ, коді чуйдіс гижны, сідзи и Владимир Тиминӧс, коді ас кадӧ кужӧмӧн отсаліс пестыны-тыдовтны томуловлысь сӧмын на мыччысьӧм енбиалунсӧ, туйдіс-велӧдіс гижны, корсьны ас ордым. 

Нӧшта А.Старцева висьтыштіс «Алёна Тувсовъя» ним улын комиӧн блог нуӧдӧм йылысь. Аслас листбок вылын сійӧ петкӧдчӧ и кыдзи гижысь – йӧзӧдӧ ассьыд кывбуръяс, кыдзи журналист – гижӧ культура юкӧнын да олӧмын выльторъяс, кыдзи уджалысь морт – пасйӧ С.Маршак нима библиотекаын лоӧмторъяс, кыдзи мам – эм челядьлӧн быдмӧм-верстяммӧм йылысь гижӧдторъяс. 

Нимкодь вӧлі тӧдмавны, мый А.Старцева гижӧ кыдзи комиӧн, сідзи и рочӧн, верстьӧлы и челядьлы, а сідзжӧ вуджӧдӧ роч вылысь коми вылӧ. Рыт вылӧ воӧмаяслӧн вӧлі позянлун кывзыны «Чужанін менам помтӧм» нима сьыланкыв.

Том аньлӧн былаӧ тырмӧ сям: и гижны, и челядькӧд уджавны, и сьывны-петкӧдчыны. Неважӧн вӧлі Россияса СМИротворец-2018 конкурслӧн кывкӧртӧд. Телеканал «Карусель» «Челядьлы да том войтырлы юӧръяс» нимпасын шедӧдіс мӧдӧд места. А петкӧдчисны найӧ «С добрым утром, малыши!» передачаын «Коми войтырлы» сиӧм петасӧн. Тайӧ вермӧмыс – тшӧтш и Нестеровъяс котырлӧн. Алёна восьтіс гусяторъяс, кыдзи сылӧн котырыс веськаліс тайӧ передача вылас да мыйӧн петкӧдчис.

Аддзысьлӧмыс артмис кыпыд да шоныд, коми руа. Алёна нинӧм дзебтӧг восьтіс ассьыс сьӧлӧмсӧ, вочавидзис юалӧмъяс вылӧ, нимкодьӧдіс миянӧс аслас вермӧмъясӧн да юксис водзӧ вылӧ пуктӧм могъясӧн. Кутам лача выль паныдасьӧмъяс вылӧ. Сиам, мед мунысь воыс коляс вежӧрын сӧмын бур казьтылӧмъяс, чышкас-нуас аскӧдыс мытшӧдъяс, лӧньӧдыштас дойяс, а выль воыс мед вӧлі шуда, кыпыд, и быд лунӧн вайис сӧмын бур сьӧлӧмкылӧмъяс.

         «Кодзулыс усьӧ
          да веськалӧ чужысьылы сьӧлӧмас –
         Пытшкӧсса югыдӧн ловзьӧдӧ
         кагуклысь син…
         Кодлӧнкӧ кодзулыс кусӧ
         да пыркалӧ чӧв-лӧняс.
         Кодлӧнкӧ олӧм чӧж
         сьӧлӧмсьыс биыс оз чин»
 

         *Нестерова Алёна Николаевна, йӧзӧдчӧ «Алёна Старцева» гусяним улын. Чужис Кӧрткерӧс районса Ыджыдвидз сиктын 1985 вося вӧльгым толысь 18-ӧд лунӧ. Помаліс ыджыдвидзса школа, Сыктывкарса канму университетса финн-йӧгра факультет «национальнӧй филология» сециальность серти. Уджавліс коми кыв велӧдысьӧн, ӧні уджалӧ С.Я.Маршак нима челядьлы Коми Республикаса национальнӧй библиотекаын.

Медводдза кывбурыс петавліс 1996 воын «Би кинь» журналын. Алёна гижӧ кывбуръяс комиӧн и рочӧн: тэчӧ верлибръяс да рифмаа стихъяс. Кывбуръяссӧ йӧзӧдлывлісны «Разноцветные фантазии», «Край родной, ты дорог мне», «Белый бор», «Небыдик ловшы», «Ме тэнӧ радейта...» альманахъясын, «Российский писатель» москваса газетын, кӧрткерӧсса «Звездаын», том войтырлы сиӧм «Йӧлӧгаын» да «Войвыв кодзув» журналын.

2011 воын Алёналӧн петіс «Лолыштӧм» кывбур чукӧр, 2015 воын - «Тувсов синва» кывбура небӧг.  2013 воын А.Старцевалы вичмис Александр Лужиков нима премиа.

< >
1/4
  • Искусство медленного чтения
    Искусство медленного чтения
    Монография
  •  ДНК = DNA: история генетической революции
    ДНК = DNA: история генетической революции
    Уотсон Джеймс Дьюи
    Научно-популярная литература
  •  Рабочие отношения
    Рабочие отношения
    Рубан В. Д.
    Популярная психология
  •  В главных ролях
    В главных ролях
    Рунге Татьяна
    Популярная психология
  • Das Göttinger Nobelpreiswunder - 100 Jahre Nobelpreis
    Das Göttinger Nobelpreiswunder - 100 Jahre Nobelpreis
    Cправочное издание
  • Валентина Челинцова
    Валентина Челинцова
    Трифонова Г. С.
    Монография
  • Казимир Малевич и его пророчество о «новом бытие»
    Казимир Малевич и его пророчество о «новом бытие»
    Сидорина Е. В.
    Монография
  • Иконография Сталина
    Иконография Сталина
    Руцинская И. И.
    Монография
< >
Яндекс.Метрика