Сыктывкар, Советская 13

+7 (8212) 24-20-04

leninka@nbrkomi.ru

пн-пт: 10 - 20

вс: 10 - 17

сб: выходной

последняя среда месяца –

санитарный день

Национальная библиотека Республики Коми
Умная библиотека для общества знаний
Расширенный поиск
«Тэнад олӧмӧ югыдлӧз кывбурӧн локта». Алёна Ельцовакӧд ёрта сёрни

Небӧг лыддьӧм бӧрын овлӧ окота сёрнитыштны гижӧд йылысь, юксьыны ас мӧвпъясӧн, видзӧдласӧн, а нӧшта  на и гижыськӧд, туялыськӧд да мукӧд нималана йӧзкӧд аддзысьлыны. Со и нуӧдім тӧвшӧр 31 лунӧ Войтырсикас небӧгаинын коми гижысь, литература туялысь Алёна Ельцовакӧд шоныд рыт.

Миянкӧд ӧтув рытпукисны и кулӧмдінса войтыр, кодъяс чукӧртчисны сиктса лыддьысянінӧ. Татшӧм позянлун сетӧ ӧтуввез.

Алёнакӧд паныдасьӧм вылӧ локтісны кыдзи гижысь котырысь ёртъяс – Нина Обрезкова, Анжелика Елфимова, Татьяна Канова, Алёна Шомысова, Владимир Цивунин, Анастасия Сукгоева,  сідзи велӧдысьяс, литература туялысьяс, на пӧвстын Раиса Ивановна Вагнер, Татьяна Леонидовна Кузнецова, Валентина Александровна Лимерова, Нина Афанасьевна Аген, а сідз жӧ искусствояс гимназияын да искусствояс колледжын велӧдчысьяс, коми поэзия радейтысьяс.

Аддзысьлӧмсӧ ми сиим Алёналӧн чужан лунлы и медводз гижысьӧс чолӧмаліс Кулӧмдінсянь мамыс – Надежда Михайловна. Кӧть и шулӧны, мый 40 арӧс оз пасйыны, да и кывкӧртӧдъяс вӧчны быттьӧ водз на, но гӧгрӧс пас - тайӧ зэв бур помка аддзысьлыны ёртъяскӧд, накӧд, кодъяс тэныд збыль вылас донаӧсь, радейтанаӧсь. Ӧд олӧмыс абу лышкыд татшӧм паныдасьӧмъяс вылӧ, кор ӧти местаӧ ӧти кадӧ тэ дорӧ локтӧны тэнӧ пыдди пуктысь, радейтысь войтыр, кодъяслӧн эм мый висьтавны. И тэныд и налы эм мыйӧн юксьыны.

Кывбуръяс Алёна гижӧ 10 арӧссянь, артмӧ бара жӧ тшупӧда пас — 30 во чӧж, «Кассяна во» медводдза кывбура небӧг да 2016-ӧд воӧ петӧм «Кодзула зэр» костын матӧ 10 во. Збыль вылас ӧд окота некымын здук вылӧ сувтыштлыны да донъявны асьтӧ, видзӧдлыны мый артмис, збыльмисны-ӧ кӧсйӧмъяс, мый окота на водзӧ вылӧ вӧчны? Та йылысь и муніс сёрниыс рыт вылын.

Тэ верстямман, и гижан уджыд сӧвмӧ тэкӧд тшӧтш. Кыдзи тэ ачыд асьтӧ донъялан? Ёна-ӧ вежсин тэ тайӧ каднас? Бергӧдчывны кӧ кызь во сайӧ, мый вылӧ ӧні видзӧдан нюмпырысь, а кутшӧм темаяс ёнджыка на йиджисны, пыдӧджык лэдзисны сьӧлӧмад вужъяссӧ?

- Дерт, быд морт вежсьö, и ме, навернö, вежси жö та мында вонад. 20 во саяд öд ме вöлi кага на – велöдчи сэки университетын, зэв ёна кöсйи мунны Москваö велöдчыны да кольччыны сэтчö овны. А öнi ме верстьö ныбаба нин, семьяа и кагаа. Тöда, мый некытчö нин коми муысь ог мун. Томдырйиыд мортыд ёнджыка гижан муслун йылысь, сы йылысь, мый виччысян. А верстямман да, мöдногаджык олан и олöмсö аддзан. Öнi, ме чайта, муслун йылысь этшаджык нин гижа, а окота гижны асгöгöрса олöм йылысь, чужан му йылысь, казьтывны челядьдырöс, пи йылысь некымын кывбур гижи вот. Öнi нюмсорöн казьтыла, кыдз ме 17 арöсöн гижлi кывбуръяс, кодъясын аддзылi ачымöс пöрысь мортöн нин.

Кодъяс найӧ, гижан уджад ышӧдысьяс, туйдысьяс? Кысянь ставыс пансис? Мыйла окота лои гижны?

- Гижан уджас туйдысьыс менам вöлi уна, и, чайта, натöг менам эськö нинöм эз артмы. Медводз Кулöмдiнса поэт В. Лодыгин, волiс школаö выступайтны, кор велöдчи 3 классын, ышöдiс миянöс, посни челядьöс, гижны ичöтик кывбуръяс. Сэсся, кор медводдза кывбуръяссö йöзöдiсны нин «Ленин туйöд» газетын, водзö гижны ышöдiс мамöй, помнита, весиг корсюрö и отсасис гижны, рифма да мый да корсьны. Сэсся, кор вои велöдчыны Сыктывкарö, водзö гижны ышöдiсны Искусствояс гимназияын коми кыв да литература велöдысь Р. И. Вагнер да профессор, филология наукаяс доктор В. А. Латышева. Тайö йöзыс ставныс зэв ёна отсалiсны меным, вöчисны унатор, мед ме лои гижысьöн, мед эг эновтчы гижан уджысь. 

Тэнад кывбуръясад лирика героиня – рам, лӧнь видзӧдласа, нор сьӧлӧма, пыді мӧвпалысь ань, кодӧс му вылас кутӧ муслун. Ань шудсӧ сійӧ йӧршитӧма ас пытшкӧ и полӧ лэдзны, йӧзӧдны, видзӧ сійӧс гусьӧн, кӧть и мукӧд дырйи дойӧн, ӧткалунӧн ойдӧ, но сэк жӧ сылӧн эм бурдӧдан вын и водзӧ вылӧ лача пестӧ.  Тадзи-ӧ ачыд аддзан ассьыд героинятӧ? Ті ӧткодьӧсь? Позьӧ тіян костын пуктыны «знак равно»?

- Кöть ме ачым туяла литература, и бура тöда лирика героиня образ йылысь, но некор ог мöвпав аслам кывбуръясын та йылысь. Ме гижа сiдз, кыдз петö сьöлöмысь, сiдзкö, ме гижа ас йылысь: аслам сьöлöм йылысь, мöвп-майшасьöм йылысь. Чайта, менам абу ньöти кывбур, кодын эськö ме гижи мöд мортлöн лов либö сьöлöмкылöм йылысь. 

Видлавны кӧ тэнсьыд гижан уджтӧ, то ӧти боксянь тэ воссян кыдзи гижысь, а мӧд боксянь туялысь. Оз-ӧ вензьыны найӧ тэнад юрад, а, гашкӧ, туялӧмыс мыйӧнкӧ и отсалӧ гижан уджад?

- Оз вензьыны. Ме чайта, найö зэв топыда йитчöмаöсь öта-мöдныскöд, и öта-мöдныслы зэв бура отсалöны, öта-мöднысö содтöны. Ме ачым гижа кывбуръяс, и чайта, бура гöгöрвоа мöд гижысьöс, сылысь гижан уджсö. А мукöд гижысьлысь творчествосö пыдiсянь туялöм-тöдмалöм, дерт, отсалö и аслам гижан уджын. Артмö, мый ме помтöг лыддьыся комиöн, лыддя важ да öнiя гижысьяслысь творчествосö. Шуам, Тима Веньлысь гижöдъяссö туялöм чуйдiс менö гижны кывбур ритма ичöтик проза гижöдъяс. 

Окота нӧшта ӧти тема вылӧ сёрнитыштны – тайӧ вуджӧдчӧмъяс. Тэ ачыд вуджӧдан кыдзи коми да роч поэтъясӧс, сідзи и эст, финн да мукӧд финн-йӧгра кывъяс вылын гижысьясӧс. Весиг-тӧ коми кыв отсӧгӧн тӧдмӧдан Тарас Шевченколӧн, Гузал Бегим да Китайысь ӧткымын авторлӧн кывбуръясӧн. Мыйла буретш тайӧ авторъясыслӧн гижӧдъясыс воӧны сьӧлӧм вылад?

- Ме зэв дыр эг вермы босьтчыны вуджöдчан уджö – гижи ёнджыкасö ачым. Босьтчыла вöлi, да оз артмы. А бöръя кадас лои уна вуджöдчан удж, и лои быть велöдчыны тайö уджас. Шуам, ИУ-ын уджалiгöн финн-угор литератураясысь хрестоматия лöсьöдiгöн ковмис комиöдны уна финн-угор гижысьлысь творчествосö. Сэсся комиöдлi некымын роч гижысьлысь кывбуръяссö юбилей кежланыс да с.в. Узбекистанысь нывбаба-поэт Гузал Бегимкöд велöдчим öтлаын Москваын Литинститутын, сыкöд ёна ёртасим, и ёртасям öнi на. Сiйö аслас кыв вылö вуджöдiс нин вель уна менсьым гижöд, найöс йöзöдiсны. Да и меным матын сылöн творчествоыс, олöм вылас да литература вылö видзöдласыс. Тарас Шевченколысь ме комиöдлi сöмын öти кывбур – вöчлi тайöс гижысьлöн юбилей кежлö, ме öд чукöртлi материал Т. Шевченкоöс комиöдöм йылысь, гижлi статья. Сьöлöм вылö воöны финн-угор поэтъяслöн творчествоыс – вепс Н. Абрамовлöн, кодкöд ёна ёртасьлiм, удмурт Ашальчи Окилöн, неважöн видлi комиöдны финн гижысь Йоуни Тоссавайненлысь кывбуръяссö, кодкöд ёртасям жö, но сылöн зэв сложнöйöсь образъясыс, метафораясыс, символъяс – комиöдны абу кокньыд.

Алёна, а коді тэнад медрадейтана гижысьяс, кыдзи мукӧд кывъя, сідзи и коми?

- Радейтана гижысь да радейтана гижöд менам уна. Но эм öти, кодöс верма лыддьыны помтöг – выльысь и выльысь. Тайö Испанияса поэт Ф. Г. Лорка. Школаын велöдчигöн на телевизор пыр видзöдi поэт йылысь передача, кылi кывбур: «И тополя уходят, но след их озёрный светел, и тополя уходят, но нам оставляют ветер…» – и тайö кывъясыс зэв ёна вöрзьöдiсны сьöлöмöс. Дерт, испанскöй кыв ме  ог тöд, но эмöсь зэв бур переводъяс роч кывйö, и найöс ме ог дугдыв лыддьыны. Гортын эм дзонь книжнöй полка, кöнi сулалöны Лоркалöн небöгъясыс – кор аддза лавкаысь выль петöм небöг, быть ньöба, кöть эськö тöда, мый сылысь ставсö нин йöзöдöма и гортын эмöсь нин выль пöв йöзöдöм гижöдъясыс. Помся тöдмала мыйкö выльöс тайö гижысь йывсьыс, уна фильм да передача сы йылысь видзöдi. Радейта француз поэт Поль Верленлысь нориник кывбуръяссö. Роч гижысьясысь меным матын Арсений Тарковскийлöн лирикаыс. Медъёна радейта коми литература. Радейтана коми гижысь – Тима Вень. Талунъя коми гижысьяс пиысь сьöлöм вылö воöны А. Мишариналöн, Е. Козловлöн, М. Елькинлöн кывбуръясыс. Ичöтдырсянь зэв ёна радейта И. Тороповлысь прозасö, Федя Мелехин йылысь циклсö.

Мый виччысян водзӧ? Мый вӧчтӧм на? Мый окота пӧртны олӧмӧ?

- Водзысь мортыд тай век виччысян мыйкö бурöс. Чайтсьö, быттьö медся мича, сьöлöм вöрзьöдана кывбурöй на менам гижтöм, и коркö лоас на гижöма. Окота уналаö ветлыны, шуам, Испанияö, кöнi чужлiс да олiс менам радейтана поэт Ф. Лорка, Францияö, кöнi олö Юля чойöй. Унатор на олöмын вöчтöм, уна мöвп юрын бергалö, окота, мед ставыс збыльмас.

Рыт вылас сёрнитісны и Алёналӧн велӧдысьяс, уджъёртъяс, гижысьяс. Быдӧн пасйис, мый Алёна – зэв уджач морт, радейтӧ велӧдчыны да сьӧлӧмсяньыс босьтчӧ гижан, туялан, вуджӧдан либӧ журналист уджӧ. Гижысьлы козинӧн лоис и Коми Республикаса искусствояс колледжын велӧдчысьяслӧн петкӧдчӧм, кодъяс мичаа лыддисны сылысь роч вылӧ вуджӧдӧм кывбуръяс.   

Сьӧлӧмсянь аттьӧалам Алёнаӧс восьса сёрниысь. Бур, мый миян эм позянлун коми кывйӧн нуӧдны аддзысьлӧмъяс, рытъяс, ӧд налы, кодъяс оз гӧгӧрвоны — вуджӧдчисны Ёртасян керка бердса кыв технология сӧвмӧдан шӧринысь Канму нимсянь вуджӧдчан бюроса уджалысьяс.

*Алёна Ельцова чужис 1979 воӧ тӧвшӧр тӧлысь 19 лунӧ Кулӧмдін сиктын. Велӧдчис медводз сиктса школаын, сэсся Коми Республикаса Юралысь бердын Ю.А.Спиридонов нима искусствояс гимназияын, помаліс Сыктывкарса канму университетысь финн-йӧгра факультет да Москваын А.М.Горький нима Литературнӧй институт.

2005 восянь Алёна уджалӧ Кыв, литература да история институтын литература секторын туялысьӧн, 2009 восянь дорйис филология наукаяса кандидат ним вылӧ диссертация.

Медводдза кывбуръясыс Алёналӧн петісны 1993 воын «Войвыв кодзув» журналын. 1998 воын «Кассяна во» небӧг йӧзӧдӧм бӧрын 19 арӧса Алёна пырӧ Россияса гижысь котырӧ. «Кодзула зэр» кывбур чукӧр шуӧма комиӧн йӧзӧдӧм 2016-ӧд вося медбур небӧгӧн. 

 

< >
1/4
    Новинки
    • Кавказская война : семь историй
      Урушадзе Амиран Тариелович
      Научно-популярная литература
    • #1917. Семнадцать очерков по истории российской революции
      Колоницкий Борис Иванович
      Научно-популярная литература
    • Несовременная страна. Россия в мире XXI века
      Иноземцев Владислав
      Научно-популярная литература
    • Математика для гуманитариев : живые лекции
      Савватеев Алексей Владимирович
      Научно-популярная литература
    • От атомов к древу : введение в современную науку о жизни
      Ястребов Сергей Александрович
      Научно-популярная литература
    • Биология добра и зла : как наука объясняет наши поступки
      Сапольски Роберт Моррис
      Научно-популярная литература
    • Встреча Вселенных, или Слепоглухие пришельцы в мире зрячеслышащих
      Суворов Александр Васильевич
      Научно-популярная литература
    • Неандерталец. В поисках исчезнувших геномов
      Пэабо Сванте
      Научно-популярная литература
    • Байки из грота : 50 историй из жизни древних людей
      Дробышевский Станислав Владимирович
      Научно-популярная литература
    • Воля и самоконтроль : как гены и мозг мешают нам бороться с соблазнами
      Якутенко Ирина
      Научно-популярная литература
    • Иван Алексеевич Куратов
      Лимеров Павел Федорович
      Научно-популярная литература
    • Путешествие с северным газом
    • Тайны нефти : популярно о нефти и нефтяной промышленности - для пытливых умов от 8 лет до ∞
      Мельникова Наталья Владимировна
    • Мозг освобожденный : как предотвратить перегрузки и использовать свой потенциал на полную мощь
      Компернолле Тео.
      Популярная психология
    • Думай как математик : как решать любые задачи быстрее и эффективнее
      Оакли Барбара.
      Научно-популярная литература
    • Лев Толстой - свободный человек
      Басинский Павел Валерьевич
      Биография
    • Финансовый менеджмент
      Бондаренко Татьяна Григорьевна.
      Учебное пособие
    • Финансы и торговля в воспроизводственном процессе
      Нешитой Анатолий Семенович.
      Монография
    • Инновационные методы эффективного развития бизнеса
      Подлесных Виктор Иванович.
      Учебное пособие
    • Маркетинговые исследования
      Скляр Елена Николаевна.
      Практическое пособие
    • Государственное регулирование экономики
      Капканщиков Сергей Геннадьевич.
      Учебное пособие
    • Международный менеджмент
      Владимирова Ирина Геннадьевна.
      Учебник
    • Экономика туристской индустрии
      Быстров Сергей Александрович.
      Учебник
    • Экономика предприятия
      Учебник
    • Финансы, деньги, кредит
      Учебник
    • Туризм – драйвер развития экономики
      Научное издание
    • Стратегический менеджмент
      Джуха Владимир Михайлович.
      Учебное пособие
    • Управленческий учет
      Булгакова Светлана Викторовна.
      Учебник
    • Стратегическая модель предприятия будущего
      Бережнов Геннадий Викторович.
      Монография
    • Основы технологии машиностроения
      Суслов Анатолий Григорьевич.
      Учебник
    • Анализ финансовой отчетности
      Васильева Людмила Сидоровна.
      Учебник
    • Информатика
      Михеева Елена Викторовна.
      Учебное пособие
    • Информатика
      Угринович Николай Дмитриевич.
      Учебник
    • Всё о черном цвете
      Кузиванова Л. Г., Торлопова Н.Г.
      Научно-популярная литература
    • В начале всех начал
      Столповский Пётр Митрофанович
      Научно-популярная литература
    • К. Ф. Жаков : грани творчества
      Монография
    • Верные клятве Гиппократа : фотолетопись : история здравоохранения города Ухты
      Научно-популярная литература
    • Китай. Его жители, нравы, обычаи, просвещение
      Бичурин Никита Яковлевич
      Сборник
    • Социокультурное проектирование исторических поселений и малых городов России. Участие населения и организация партнерств
      Севан Ольга Георгиевна
      Монография
    • Компетенция. Компетентность. Компетентностный подход
      Рудинский Игорь Давидович
      Монография
    < >
  • Мы в соц сетях
  • Яндекс.Метрика